ਪੰਜਾਬ 'ਚ ਕਈ ਥਾਂਵਾਂ 'ਤੇ ਮੀਂਹ ਨਾਲ ਮਿਲੀ ਰਾਹਤ

ਚੰਡੀਗੜ੍ਹ, 6 ਜੁਲਾਈ-ਮੌਨਸੂਨ ਤੋਂ ਪਹਿਲਾਂ ਦੀ ਹੋਈ ਦਰਮਿਆਨੀ ਬਾਰਿਸ਼ ਨੇ ਪੰਜਾਬ ਸਮੇਤ ਉੱਤਰੀ ਭਾਰਤ ਦੀ ਤਪਸ਼ ਕਾਫ਼ੀ ਹੱਦ ਤੱਕ ਘਟਾ ਦਿੱਤੀ ਹੈ ਜਿਸ ਕਾਰਨ ਲੋਕਾਂ ਨੇ ਰਾਹਤ ਮਹਿਸੂਸ ਕੀਤੀ ਹੈ। ਚੰਡੀਗੜ੍ਹ, ਪੰਜਾਬ, ਹਰਿਆਣਾ, ਦਿੱਲੀ ਅਤੇ ਉੱਤਰ ਪ੍ਰਦੇਸ਼ ਤੱਕ ਹੋਈ ਇਸ ਪੂਰਵ ਮੌਨਸੂਨ ਦੀ ਬਾਰਿਸ਼ ਨੇ ਇਹ ਸਪੱਸ਼ਟ ਸੰਕੇਤ ਦੇ ਦਿੱਤਾ ਹੈ ਕਿ ਆਉਂਦੇ 24 ਘੰਟਿਆਂ ਵਿਚ ਮੌਨਸੂਨ ਵੀ ਇੱਥੇ ਆ ਜਾਵੇਗਾ। ਮੌਸਮ ਵਿਭਾਗ ਚੰਡੀਗੜ੍ਹ ਤੋਂ ਪ੍ਰਾਪਤ ਜਾਣਕਾਰੀ ਅਨੁਸਾਰ ਇਸ ਵੇਲੇ ਮੌਨਸੂਨ ਦਿੱਲੀ ਦੇ ਨੇੜੇ ਤੇੜੇ ਪੁੱਜ ਚੁੱਕਾ ਹੈ। ਤੇਜ਼ ਹਵਾਵਾਂ ਕਾਰਨ ਮੌਨਸੂਨ ਰਸਤੇ ਤੋਂ ਕੁੱਝ ਭਟਕ ਗਿਆ ਸੀ, ਪਰ ਹੁਣ ਇਹ ਮੁੜ ਆਪਣੇ ਸਹੀ ਰਸਤੇ 'ਤੇ ਅੱਗੇ ਵੱਧ ਰਿਹਾ ਹੈ। ਅੱਜ ਉੱਤਰੀ ਭਾਰਤ ਦੇ ਕਈ ਇਲਾਕਿਆਂ ਵਿਚ ਹੋਈ ਬਾਰਿਸ਼ ਮੌਨਸੂਨ ਦੇ ਸਹੀ ਰਸਤੇ 'ਤੇ ਅੱਗੇ ਵੱਧਣ ਦੇ ਸੰਕੇਤ ਹਨ। ਵਿਭਾਗ ਅਨੁਸਾਰ ਅੱਜ ਜਿੱਥੇ ਚੰਡੀਗੜ੍ਹ ਵਿਚ 19.6 ਮਿਲੀਮੀਟਰ, ਡੇਰਾਬੱਸੀ ਵਿਚ ਸਾਢੇ 8 ਮਿਲੀਮੀਟਰ ਬਾਰਿਸ਼ ਹੋਈ, ਉੱਥੇ ਅੰਮ੍ਰਿਤਸਰ ਵਿਚ ਵੀ ਸਾਢੇ 8 ਮਿਲੀਮੀਟਰ ਬਾਰਿਸ਼ ਦਰਜ ਕੀਤੀ ਗਈ।

ਪਟਿਆਲਾ ਦੇ ਇਕ ਪਿੰਡ ਵਿਚ ਭਾਰੀ ਮੀਂਹ ਤੋਂ ਬਾਅਦ ਝੋਨੇ ਦੇ ਖੇਤ ਨੇੜੇ ਮੀਂਹ ਦੇ ਪਾਣੀ ਵਿਚ ਖੇਡਦੇ ਬੱਚਿਆਂ ਨੂੰ ਵੇਖਦੇ ਹੋਏ ਕਿਸਾਨ।

ਇਸ ਤੋਂ ਇਲਾਵਾ ਪੰਜਾਬ ਵਿਚ ਜਲੰਧਰ, ਰੂਪਨਗਰ, ਪਟਿਆਲਾ, ਸ਼ਾਹਪੁਰ ਕੰਡੀ, ਰਣਜੀਤ ਸਾਗਰ ਡੈਮ ਅਤੇ ਮਾਧੋਪੁਰ ਇਲਾਕਿਆਂ ਵਿਚ ਬਾਰਿਸ਼ ਹੋਈ। ਮੁਕੇਰੀਆਂ ਇਲਾਕੇ ਵਿਚ 13 ਮਿਲੀਮੀਟਰ ਬਾਰਿਸ਼ ਹੋਣ ਦੀ ਸੂਚਨਾ ਹੈ। ਹਰਿਆਣਾ ਦੇ ਯਮੁਨਾਨਗਰ ਅਤੇ ਪੰਚਕੂਲਾ ਵਿਚ ਵੀ 20 ਮਿਲੀਮੀਟਰ ਵਰਖ਼ਾ ਦਰਜ ਕੀਤੀ ਗਈ। ਇਸ ਬਾਰਿਸ਼ ਨਾਲ ਉੱਤਰੀ ਭਾਰਤ ਦੇ ਇਲਾਕਿਆਂ ਦੇ ਤਾਪਮਾਨ ਵਿਚ 70 ਫ਼ੀਸਦੀ ਤੱਕ ਗਿਰਾਵਟ ਵੇਖਣ ਨੂੰ ਮਿਲੀ। ਚੰਡੀਗੜ੍ਹ ਵਿਚ ਦੁਪਹਿਰ ਦਾ ਤਾਪਮਾਨ 30 ਡਿਗਰੀ ਮਾਪਿਆ ਗਿਆ। ਮੌਸਮ ਬਾਰੇ ਕੀਤੀ ਗਈ ਭਵਿੱਖਬਾਣੀ ਅਨੁਸਾਰ ਪੰਜਾਬ, ਚੰਡੀਗੜ੍ਹ ਅਤੇ ਹਰਿਆਣਾ ਵਿਚ ਗਰਜ ਚਮਕ ਨਾਲ ਮੀਂਹ ਦੇ ਛਰਾਟੇ ਅਤੇ 24 ਘੰਟਿਆਂ ਤੱਕ ਭਰਪੂਰ ਬਾਰਿਸ਼ ਹੋਣ ਦੀ ਸੰਭਾਵਨਾ ਹੈ। ਜਿੱਥੇ  ਚੰਡੀਗੜ੍ਹ ਅਤੇ ਅੰਬਾਲੇ ਦਾ ਆਸਮਾਨ ਬੱਦਲਾਂ ਨਾਲ ਢੱਕਿਆ ਹੋਇਆ ਹੈ, ਉੱਥੇ ਲੁਧਿਆਣਾ ਅਤੇ ਅੰਮ੍ਰਿਤਸਰ ਦੇ ਇਲਾਕਿਆਂ ਵਿਚ ਵੀ ਬੱਦਲਵਾਈ ਛਾਈ ਹੋਈ ਹੈ। ਅੰਮ੍ਰਿਤਸਰ, ਲੁਧਿਆਣਾ ਅਤੇ ਅੰਬਾਲਾ ਇਲਾਕਿਆਂ ਦਾ ਵੱਧ ਤੋਂ ਵੱਧ ਤਾਪਮਾਨ 30 ਤੋਂ 34 ਡਿਗਰੀ ਦੇ ਆਸ ਪਾਸ ਦਰਜ ਕੀਤਾ ਗਿਆ ਹੈ। ਸਭ ਤੋਂ ਵੱਧ ਤਾਪਮਾਨ ਪਟਿਆਲੇ ਦਾ 38.4 ਡਿਗਰੀ ਦਰਜ ਕੀਤਾ ਗਿਆ ਜਿਥੇ ਵੀ ਬਾਰਿਸ਼ ਪੈਣ ਦੀ ਸੂਚਨਾ ਹੈ। ਵਿਭਾਗ ਦੇ ਨਿਰਦੇਸ਼ਕ ਸ੍ਰੀ ਸੁਰਿੰਦਰਪਾਲ ਨੇ ਦੱਸਿਆ ਕਿ ਇਸ ਵਾਰ ਜੂਨ ਦਾ ਮਹੀਨਾ ਸੁੱਕਾ ਨਿੱਕਲ ਜਾਣ ਕਾਰਨ ਮੌਨਸੂਨ ਦੀ ਬਾਰਿਸ਼ ਵਿਚ ਕੁੱਝ ਕਮੀ ਭਾਵੇਂ ਆ ਜਾਵੇ, ਪਰ ਜੁਲਾਈ ਅਗਸਤ ਵਿਚ ਇਹ ਕਮੀ ਪੂਰੀ ਹੋ ਸਕਦੀ ਹੈ, ਹੁਣ ਭਾਵੇਂ ਤਾਪਮਾਨ ਘੱਟ ਗਿਆ ਹੈ, ਪਰ ਤਪਦੀ ਧਰਤੀ 'ਤੇ ਬਾਰਿਸ਼ ਪੈਣ ਉਪਰੰਤ ਪੈਦਾ ਹੋਣ ਵਾਲੀ ਹੁੰਮਸ ਕਾਰਨ ਜੁਲਾਈ ਦੇ ਅਖ਼ੀਰ ਤੱਕ ਤਾਪਮਾਨ ਵਿਚ ਮੁੜ ਵਾਧਾ ਹੋ ਸਕਦਾ ਹੈ। ਕੁੱਲ ਮਿਲਾਕੇ ਇਸ ਵਾਰ ਮੌਨਸੂਨ ਦੀ ਠੀਕ ਠਾਕ ਵਰਖ਼ਾ ਹੋਣ ਦੀ ਪੂਰੀ ਸੰਭਾਵਨਾ ਹੈ।

ਦਿੱਲੀ 'ਚ ਭਾਰੀ ਮੀਂਹ
ਨਵੀਂ ਦਿੱਲੀ (ਆਈ. ਏ. ਐਨ. ਐਸ.)-ਦਿੱਲੀ ਅਤੇ ਇਸ ਦੇ ਲਾਗਲੇ ਇਲਾਕਿਆਂ 'ਚ ਭਾਰੀ ਮੀਂਹ ਪੈਣ ਨਾਲ ਲੋਕਾਂ ਨੂੰ ਰਾਹਤ ਮਿਲੀ ਹੈ। ਮੌਸਮ ਵਿਭਾਗ ਨੇ ਅਗਲੇ ਚਾਰ-ਪੰਜ ਦਿਨਾਂ ਤੱਕ ਭਾਰੀ ਮੀਂਹ ਪੈਣ ਦੀ ਭਵਿੱਖਬਾਣੀ ਕੀਤੀ ਹੈ। ਕਈ ਦਿਨਾਂ ਤੱਕ ਜ਼ਿਆਦਾ ਗਰਮੀ ਦੇ ਬਾਅਦ ਸ਼ੁੱਕਰਵਾਰ ਦਾ ਦਿਨ ਭਾਰੀ ਮੀਂਹ ਦੇ ਨਾਲ ਦਿੱਲੀ ਅਤੇ ਐਨ. ਸੀ. ਆਰ. ਦੇ ਲੋਕਾਂ ਲਈ ਰਾਹਤ ਲੈ ਕੇ ਆਇਆ। ਮੌਸਮ ਵਿਭਾਗ ਅਨੁਸਾਰ ਸ਼ਾਮ ਤੋਂ ਦਿੱਲੀ ਅਤੇ ਇਸ ਦੇ ਨਾਲ ਦੇ ਇਲਾਕਿਆਂ 'ਚ ਭਾਰੀ ਮੀਂਹ ਪਿਆ, ਜਿਸ ਨਾਲ ਗਰਮੀ ਤੋਂ ਲੋਕਾਂ ਨੂੰ ਸੁੱਖ ਦਾ ਸਾਹ ਮਿਲਿਆ। ਮੀਂਹ ਕਾਰਨ ਸੜਕਾਂ 'ਤੇ ਕਾਫੀ ਪਾਣੀ ਜਮ੍ਹਾਂ ਹੋ ਗਿਆ ਅਤੇ ਜਗ੍ਹਾ-ਜਗ੍ਹਾ ਲੋਕਾਂ ਨੂੰ ਜਾਮ ਦਾ ਸਾਹਮਣਾ ਕਰਨਾ ਪਿਆ। ਇਥੋਂ ਤੱਕ ਕਿ ਮੀਂਹ ਨਾਲ ਮੈਟਰੋ ਰੇਲਾਂ ਵੀ ਪ੍ਰਭਾਵਿਤ ਹੋਈਆਂ।